Alda Nielsdóttir
Tvey fólk eru dripin, og fleiri eru særd í ukrainskum dronuálopum í tveimum russiskum landslutum, boða russiskir myndugleikar frá fyrrapartin.
Í býnum Rostov kyknaði eldur í einum íbúðarbygningi, og har bleiv líkið av einum manni funnið. Fýra onnur fólk vórðu særd í hesum álopinum.
Í Belgorod-landslutinum varð ein kvinna dripin og ein maður særdur, tá ein ukrainsk drona rakti eitt akfar.
Eisini ukrainar boða frá russiskum álopum í nátt, skrivar Ritzau.
Boðað verður frá, at russiskar dronur hava rakt undirstøðukervi í býnum Kryvyj Rih, sum likkur mitt í Ukraina og sum eisini er føðibýurin hjá ukrainska forsetanum, Volodymyr Zelenskyj. Hetta hevur fingið myndugleikarnar at slíta streymveitingina hjá túsundatals borgarum.
Hvussu umfatandi álopið er, er ógreitt, og heldur ikki er greitt, um nakar fólkaskaði stóðst av álopinum.
Vinarliga broyt tínar kennifíla - og privatlívsstillingar fyri at síggja hetta innihald