Russland sent 500 dronur og 50 rakettir yvir Ukraina í nátt

Fimm fólk vórðu dripin, og tíggju fólk vórðu særd í russiskum álopum á Ukraina í nátt, boðar ukrainski forsetin, Volodymyr Zelenskyj frá á X.

Sambært Zelenskyj vórðu yvir 50 rakettir og umleið 500 dronur brúktar í álopunum, sum rakti um alt landið.

Málið hjá russunum var týðandi undirstøðukervi og ukrainska orkumálaráðið, og orkuundirstøðukervi í fleiri landslutum hevur eisini fingið skaða. Ukrainska orkumálaráðið sigur, sambært Reuters, at nógv eru uttan streym í Zaporizjzja-landslutinum.

Russisku álopini fingu Pólland at senda hernaðarflogfør í luftina fyri at tryggja pólska loftrúmið. Millum økini, sum vóru rakt í álopunum var Lviv, sum er nær við pólska markið, skrivar Ritzau.

Russland hevur ikki viðmerkt álopini.