Russar fyrireika seg til kríggj móti Nato

Russland er farið undir eitt kunningar- og sálarfrøðiligt átak, ið skal fyrireika fólkið í Russlandi til eitt komandi kríggj móti Nato. Talan er um fyrsta stig, sokallaðu “fasu 0”. Hetta skrivar amerikanska tankasmiðjan ISW, Institute for the Study of War, í nýggjastu fregnargreining síni.

Herferðin umfatar bæði opin og loynilig álop á Nato-lond. Sambært fregnarupplýsingum kann hetta síggjast í sokallaðum flaggvirksemi, sum merkir virksemi, har tað skal fatast sum um, at tað er onkur triðji partur, sum stendur aftanfyri. Men tankasmiðjan nevnir eisini yvirgangsatsóknir, elektroniska krígsførslu, GPS-jamming, eldáseting og ikki minst innrásir í Nato-loftrúm, skrivar ISW.

- Hetta mynstrið av skipaðum virksemi bendir á, at Russland er farið inn í fyrstu fasu av fyrireikingunum – “Fasu 0” – fyri at førka seg upp í eitt hægri krígsstøði enn tað, sum Russland í løtuni er í, eitt nú eitt framtíðar kríggju millum Russland og Nato, sigur metingin.

Her verður lagt afturat, at virksemi “setir treytirnar fyri at rættvísgera og savna almennan stuðul til møgulig framtíðar álop móti Nato”.

Enn er óvist hvørji tíðarlinju, ið Kreml arbeiðir við hesum viðvíkjandi, skriva danskir fjølmiðlar.

Fríggjadagin almannakunngjørdi fregnartænastan hjá donsku verjuni, FE, eina nýggja meting av sokallaða hybrid-hóttanini móti Danmark. Her metir FE, at Russland í løtuni førir eitt hybrid-kríggj móti Nato og vestanlondum, og sagt verður at yvirgangshóttanin móti donsku verjuni er stór.

Troels Lund Poulsen, verjumálaráðharri, upplýsti tó, at tað í løtuni ikki er talan um hóttanir um eitt veruligt hernaðarligt álop á Danmark.

Russiski forsetin, Vladimir Putin, hevur annars føðingardag í dag. Hann fyllir 73 ár.