Royna at fáa rættin at støðga umvalinum

Tórbjørn Jacobsen, borgarstjóri í Runavíkar kommunu, og fýra aðrir býráðslimir royna nú at fáa Føroya rætt til at støðga avgerðini hjá táverandi Løgmálaráðnum at útskriva umval í Runavíkar kommunu.

Umvalið er sett at vera komandi týsdag, 13. januar.

Men í morgin – eina viku undan umvalinum – verður eitt borgarligt mál viðgjørt í rættinum, har fimm limir í sitandi býráði í Runavík royna at ógilda avgerðina hjá táverandi Løgmálaráðnum. Av tí at Løgmálaráðið nú er niðurlagt, er tað Fígjarmálaráðið, ið hevur løgmál undir sær, sum er stevnt í málinum.

Sambært rættarlistanum eru tað Tórbjørn Jacobsen og Tóri Højgaard, varaborgarstjóri og útbúgvin løgfrøðingur, sum hava stevnt Fígjarmálaráðnum.

Men Frihedsbrevet veit i dag at siga, at eisini Sigrun Jónsveinsdóttir, Petur Hansen og Jóhan Vest eru við í stevningini. Frihedsbrevet veit eisini at siga, at málið um at stevna Fíggjarmálaráðið hevur verið fyri á afturlatnum býráðsfundi, men fekk ikki meiriluta. Tað eru limirnir, sum komu í minniluta, sum nú hava stevnt, skrivar Frihedsbrevet.

Teir fimm býráðslimirnir vísa í stevningini á, at býráðslimir ikki vórðu hoyrdir áðrenn avgerð var tikin at ógilda valið. Hetta verður mett sum brot á meginregluna um partshoyring. Eisini vísa tey á, at avgerðin er brot á lutfalsmeginregluna um, at ein myndugleiki eigur at taka ta minst inntrívandi avgerðina, tá tað ber til. Tey vísa eisini, at avgerðin er ov illa upplýst, tí hon einans er grundað á at ákærin hevur valt at reisa ákæru og Løgmálaráðið sjálvt ikki hevur gjørt nakrar sertakar kanningar ella hevur innlit í kanningar hjá løgregluni. Loksins vísa tey á, at Løgmálaráðið er ógegnigt, tí Nella Festirstein, aðalsrjóri er gift við Christiani Andreasen, ið er advokatur hjá ákærda valstýrisformanninum í Oyndarfirði.

Frihedsbrevet skrivar, at Nella Festirstein tó ikki hevur verið partur av avgerðini hjá Løgmálaráðnum, men stevnandi politikararnir halda, at alt Løgmálaráðið átti at verið ógegnugt av hesi orsøk.