Qodio flutt yvir um fjørðin

Samskiftisfyritøkan Qodio, sum hevur hildið til í Runavík er farið yvir um fjørðin, og hevur nú høvuðsskrivstovu á Strondum á Strandavegi 1, har Føroya Banki fyrr helt til.

Borgarstjórin í Sjóvar kommunu, Artur Johansen, var á vitjan hjá fyritøkuni í dag, og bjóðaði vælkomin. Tað skrivar heimasíðan hjá kommununi í dag.

Seks fólk starvast dagliga í fyritøkuni, sum síðani 2010 hevur ment heimasíður til føroyska og útlendska marknaðinum undir navninum Faroe Media. Í 2017 varð navnið broytt til Qodio, og tað úttalast “kodio”. Stórur partur av virkseminum hjá Qodio er forritan, men eisini verður grafiskt arbeiði gjørt fyri fyritøkur og stovnar.

Útvarpsrásin R7 leigar eisini høli frá Qodio, og ger tíðindasendingar og annað har frá.