Plantaðu 1000 trø á Sevmýri í dag

Í besta sólskinsveðri var skjøtul settur á nýggja viðarlund á Sevmýri á Tvøroyri í dag.

Borgarstjórin á Tvøroyri, Kristin Mikkelsen, setti fyrsta træið niður stutt eftir døgurða. Tilsamans setti manningin hjá Skógrøkt Landsins, saman við viðarlundarvørðinum hjá Tvøroyrar Kommunu, stívliga 1000 trø niður.

Borgarstjórin fegnaðist í stuttari røðu um, at Skógrøktin tók hetta stigið og at býurin fær enn eitt hugnaligt stað til borgararnar.

Træsløgini, ið vórðu sett niður í dag, eru royniviður, øsp og lerkur. Í næstum verða eini 1.500 trø gróðursett afturat.

Viðarlundin, sum er 11.300 fermetrar til støddar, er omanfyri vegin úti á Sevmýru og er framhald av viðarlundini, sum Thorvald Joensen, lærari, gróðursetti fyri mongum árum síðani. Eftir deyða hansara varð garðurin latin Skógfriðingarnevndini.

Nýsettu trøini hava eru tí í góðari lívd av tí gamla garðinum. Tað næsta, sum er í umbúna, er at gera gøtur og opin pláss til beinkir og borð, soleiðis at fólk kunnu fáa gleði at njóta hesa náttúruperlu í horvir í ein sunnan.

Við hesum hevur Tvøroyrar Kommuna fingið enn eina viðarlund. Frammanundan er ein lund omanfyri sjúkrahúsið og so Plantasjan í Trongisvági, har tað fyrsta varð plantað í 1920’unum. Tvøroyrar Kommuna hevur næststørstu skógfriðaða lendi í landinum, bara Tórshavnar Kommuna hevur meira.

Kristin Mikkelsen, borgarstjóri fegnast um góða samstarvi við Skógrøktina og segði seg vóna, at tað kann halda fram. 

Tíðindaskriv frá Skógfriðingarnevnd Landsins