Onnur viðgerð av fosturtøkulógini verður týsdagin

Fríggjadagin legði Rættarnevndin fram álit um uppskotið til fosturtøkulóg, og onnur viðgerð av málinum er nú ásett at verða týsdagin, framgongur í skránni hjá Løgtinginum.

Limirnir í Rættarnevndini - Hervør Pálsdóttir, Helgi Abrahamsen, Ingilín Didriksen Strøm, Kristianna Winther Poulsen, Henrik Old, Steffan Klein Poulsen og Elsebeth Mercedis Gunnleygsdóttur hava býtt seg í tríggjar minnilutar.

Hervør Pálsdóttir, Ingilín Didriksen Strøm og Kristianna Winther Poulsen mæla tinginum til at samtykkja uppskotið.

Tær siga, at galdandi fosturtøkulóg frá 1956 er ikki nøktandi, og er tíðin búgvin at dagføra fosturtøkulógina.

– Fosturtøkur hava altíð verið framdar og fara altíð at verða framdar. Trygt ella ótrygt. Lógliga ella ólógliga. Her í landinum ella aðrastaðni. Tað, sum er kjarnin í lógaruppskotinum,er ikki, um fosturtøkur frameftirskulu fremjast ella ikki. Kjarnin snýr seg um,hvør skal taka avgerðina. Avgerðarrætturin verður fluttur frá læknanum til kvinnuna, skrivar tær m.a.

Helgi Abrahamsen, Elsebeth Mercedis Gunnleygsdóttur og Steffan Klein Poulsen mæla frá at samtykkja uppskotið.

Tey siga seg vera samd í, at fosturtøkulógin átti at verið dagførd, men eru tey ímóti einari liberalisering.

– Fyrsta treytin fyri, at Føroyar kunnu vera eitt gott barnaland er, at øll børn fáa loyvi til at verða fødd - uttan mun til sosiala støðu, brek, rasu, húðarlit, kyn, etniskan uppruna o.s.fr. Fær eitt barn ikki rættin at verða føtt, so kann alt annað gera tað sama, skriva tey m.a.

Eisini vísa tey á, at eitt líknandi uppskot fall í tinginum í fjør.

– Nú, meðan ein lítil tíðaravmarkað broyting er í samansetingini av Løgtinginum, verður málið lagt fram í skundi, tí ein møgulig undirtøka kann vera burtur aftur longu um stutta tíð. Hetta má sigast at vera ein løgin arbeiðsháttur, sum leggur upp til, at lógin skal verða broytt frá valskeiði til valskeið, alt eftir hvussu samansetingin er í Løgtinginum frá eini løtu til aðra.

Triði minnilutin, Henrik Old mælir eisini frá at samtykkja uppskotið.

Hann skrivar, at hann ætlar sær at leggja uppskot til samtyktar um at heita landsstýrið um at geva kvinnum, sum eiga fyrstu ferð, eina munandi eingangsupphædd. Hendan upphæddin skal koma úr Barsilsgrunninum, har ov mikið er at taka av.

Alt álitið kann lesast her