Ongar ætlanir at steðga í Hetlandi eftir oyggjaleikagestum

Tað hevði uttan iva verið høgligt hjá hetlendingum, men ongar ætlanir eru hjá Norrønu um at steðga á í Hetlandi næsta summar at fara eftir hópinum, sum skal til oyggjaleikir í Føroyum 3. til 9. juli.

Hetta skrivar Shetland News í dag. Miðilin hevur spurt seg fyri hjá Smyril Line, um nakar møguleiki er fyri, at Norrøna kann leggja at í Hetlandi undan leikunum.

Norrøna siglir framvið Hetland á rutusiglingini millum Føroyar og Danmark, men síðan 2007 hevur ikki verið lagt at landi har.

Í løtuni hevur Smyril Line ongar ætlanir um at gera broytingar í siglingini hjá Norrønu fyri oyggjaleikir í 2027.

Shetland News skrivar, at hetlendski hópurin tískil ferðast luftvegis. Atlantsflog flýgur regluliga til og úr Edinburgh.