Nýtt frímerki - Skótarørslan í Føroyum 100 ár

Í dag gevur Posta út eitt nýtt frímerki í sambandi við 100 ára føðingardagin hjá skótarørsluni í Føroyum.

Í sambandi við føðingardagin verður móttøka í Skótahøllini hjá SSB við Havnará í dag, 2. februar. Dyrnar lata upp klokkan 14, og móttøkan byrjar klokkan 16, har Sigurð L. Lamhauge, fylkisstjóri, fer at siga nøkur orð, og Ingun N. Olsen frá Posta fer at greiða frá um frímerkið, skrivar Posta í tíðindaskrivi.

Tað var í 1926 at fýra ungdómar í Havn settu Skótafylki Sigmunds Brestissonar á stovn. Longu tvey ár seinni, í 1928, byrjaðu gentuskótarnir hjá KFUK, meðan dreingjaskótarnir hjá KFUM byrjaðu virksemið í 1939. Frelsunarherurin hevur eisini havt skótavirksemi eitt tíðarskeið.

Skótarørslan er heimsins størsta barna- og ungdómsrørsla við áleið 60 milliónum skótum í fleiri enn 200 londum. Í Føroyum eru umleið 1.000 skótar.

Tað var Robert Baden-Powell, sum byrjaði altjóða skótarørsluna, tá hann í 1907 skipaði fyri tí fyrstu skótaleguni fyri dreingir á oynni Brownsea Island. Her lærdu teir um náttúruna og m.a. at sova úti. Hetta varð byrjanin til skótarørsluna, ið skjótt breiddi seg kring heimin.

Skótarørslan byggir á felagsskap, ábyrgd, virðing, útilív og persónliga menning. At vera skóti gevur upplivingar, førleikar og minnir fyri lívið.

Málningin, sum frímerkið myndar, hevur Jón Magnus Joensen málað.

Frímerkini fáast til keyps á www.stamps.fo og á posthúsum kring landið. Á heimasíðuni ber eisini til at lesa greinar um føroysk frímerki.