Norskur kvinnusangbólkur av Stord á Føroyavitjan

Sangbólkur mMokkat úr Noregi hevur leygardagin matiné í Havnar kirkju. Í bólkinum eu átta kvinnur, fýra av teimum eru yrkistónleikarar og hinar eru royndir kórsangarar. Tær hava sungið saman í 12 ár og bólkurin hevur heimstað í oynni Stord, sum liggur millum Bergen og Stavanger.

Bólkurin hevur sungið nógv á norska Vestlandinum, hevur verið á tónleikarundferð í Norðurnoregi, Trondheim og Bergen. Tær hava eisini verið á konsertferð Litava.

Repertoirið hjá bólkinum er sera fjølbroytt: Renessansetónleikur, kirkjutónleikur av m.a. tónleikasmiðinum Kjersti Follesø, sum syngur við í ensemblinum, fólkatónleikur og verðsligur nútímans tónleikur og romantiskir sangir. Leygardagin er mest kirkjuligur tónleikur á skránni.

Kjersti Follesø skrivar nógvan tónleik. Bara tann síðsta mánaðin hevur bólkurin framført fleiri nýggj løg av henni og alt í alt hava tær frumframført yvir 20 verk av Follesø.

Bólkurin leggur dent á at framføra tónleik av kvinnuligum yrkjarum og tónleikarum.

Í sangbólkinum mMokkat syngja: Anne Guro Korsvoll, Ingjerd Kannelønning Kolstad, Maria Malmsten (listarligur leiðari) Kjersti Follesø (tónasmiður), Britt Kristin Balchen, Tone Heide, Siw Vad Haraldsen og Herborg Tegle.

Bólkurin er í Føroyum í fimm dagar og fer at hava konsert í Løkshøll hóskvøldið saman við Eysturoyar symfoniorkestri, matiné í Havnar kirkju leygardagin og í Fuglafjarðar kirkju seinnapartin sunnudagin.