Mette Frederiksen aftur samráðingarleiðari

Mette Frederiksen, virkandi forsætisráðharri og forkvinna hjá Sosialdemokratunum hevur verið inni hjá Fríðrikki kongi og er aftur vorðin samráðingarleiðari.

Hetta er ikki óvæntað, eftir at meirilutin fyrr í dag peikaði á hana, eftir at Troels Lund Poulsen mátti boða kong frá, at hann ikki megnaði at skipa stjórn.

Mette Frederiksen boðar frá, sambært donskum miðlum, at hon hevur kallað inn til samráðingar á Marienborg í morgin, og at samráðingarnar halda fram alla hvítusunnuna.

Nýútnevndi samráðingarleiðarin vil arbeiða fyri at skipa stjórn við Sosialistiska Fólkaflokkinum, Radikala Vinstraflokkinum, og Moderatunum.

Í dag eru 59 dagar síðan fólkatingsvalið. Ongantíð áður hevur tað tikið so langa tíð at skipa stjórn í Danmark.