Maðurin handan “Driving Home for Christmas” deyður

Bretski sangarin, Chris Rea, best kendur fyri jólaklassikaran 'Driving Home for Christmas', er deyður, skrivar BBC.

- Hann sovnaði stillisliga á sjúkrahúsi fyrr í dag, eftir stutta sjúkralegu, umgyrdur av familju, upplýsti ein talsmaður fyri BBC.

Chris Rea gjørdist 74 ár. Í 2001 fekk hann staðfest krabbamein í brisinum, sum tá varð skorið burtur.

'Driving Home for Christmas' var upprunaliga b-síðan á eini single-plátu, sum hann gav út í 1986. Í 2012 varð sangurin kosin sum 12. best umtókti jólasangurin í Bretlandi.

Rea hevur givið út 25 heildarútgávur, tann fyrsta kom í 1978. Umframt vælumtókta jólasangin, er hann kendur fyri sangirnar “Fool (if You think it’s Over)”, "I can hear Your Heartbeat” frá 1983 og “The Road to Hell” frá 1989.