Inntøkurnar í Eystur- og Sandoyartunlinum økjast ár eftir ár

Í 2025 øktust ferðsluinntøkurnar frá Eystur- og Sandoyartunlinum við níggju prosentum.

Ferðsluinntøkurnar í fjør vóru íalt 215 milliónir krónur, í mun til 197 milliónir krónur árið fyri, skrivar felagið Eystur- og Sandoyartunlar í tíðindaskrivi.

Inntøkurnar frá Eysturoyartunlinum vóru í 2025 181 milliónir krónur, í mun til 168 milliónir krónur í 2024. Hetta er ein vøkstur á 7,7 prosent.

Inntøkurnar frá Sandoyartunlinum vóru 34 milliónir krónur, í mun til 29 milliónir krónur í 2024, sum er ein vøkstur á 17 prosent.

Í 2025 koyrdu 2.365.349 bilar gjøgnum Eysturoyartunnilin, í mun til 2.177.962 bilar í 2024. Hetta er ein vøkstur á 8,6 prosent.

Ferðslan svarar til eina miðalferðslu per dag á 6.480 bilar. Í 2024 var talan um 5.951 bilar/dag.

Í Sandoyartunlinum koyrdu 391.599 bilar í 2025, í mun til 363.289 bilar í 2024. Hetta er ein vøkstur á 7,8 prosent. Ferðslan svarar til eina miðalferðslu per dag á 1.073 bilar í mun til 993 bilar/dag í 2024.

Einki ferðslutrygdargjald frá landinum var neyðugt fyri 2025. Í samband við fíggingina av byggingini av Eystur- og Sandoyartunlinum veitti landið eina ferðslutrygd, soleiðis, at felagið altíð megnar at gjalda síni lánsgjøld, rentur og avdráttir, umframt rakstrarútreiðslur í mun til mettar ferðsluinntøkur.

Netto rentuberandi skuldin við ársenda 2025 er 1.978 milliónir krónur. Lánið var upprunaliga 2.640 milliónir krónur. Lánið hevur eina fasta rentu á 2,73 prosent fram til 31.01.2040, tá øll skuldin er afturgoldin. Við øðrum orðum, er skuldin hjá tunlunum afturgoldnir um 14 ár, skrivar tunnilsfelagið.

Kostnaðurin fyri byggingina av báðum tunlunum, sum í alt eru 22 km langir, var 2.580 milliónir krónur, netto inntøkur/útreiðslur fyri at gera verkætlanina lidna fyri tíð. Hetta svarar til 117 milliónir fyri kilometurin. Rentur í byggitíðini eru ikki íroknaðar.

Tá felagið fór undir byggingina, var metti byggikostnaðurin 2.640 milliónir krónur. Eysturoyartunnilin var bygdur frá 2017 til 2020, meðan Sandoyartunnilin var bygdur frá 2019 til 2023.