Hava stongt alment ves í Leirvík: Fleiri tilburðir av herverki

Í neystinum í Bug í Leirvík er alment baðirúm og vesi. Í eina tíð hava fleiri tilburðir av herverki verið inni í neystinum, har ristir og vesikummur hava verið tiptar, vesipappír er brent inni á vesinum o.a, sigur Eysturkommuna á heimasíðuni.

Hetta tilboðið hevur annars verið væl brúkt, eitt nú av teimum, ið dyppa í Leirvík, umframt øðrum, ið vitja á sandinum.

Herverkstilburðirnir hava tíverri við sær, at neystið verður stongt frá í dag, 20. november. Boðað verður frá, tá neystið er opið fyri almenninginum aftur, sigur kommunan.