Procesbevillingsnævnet loyvir ikki Fíggjarmálaráðnum í landsrættin

Fíggjarmálaráið sleppur ikki í landsrættin við úrskurðinum um steðgandi virknað av umvalinum í Runavíkar kommunu. Tað hevur Procesbevillingsnævnet avgjørt, boðar Fíggjarmálaráðið frá.

Fíggjarmálaráðið ynskti at kæra úrskurðin hjá Føroya Rætti sum tann 9. januar avgjørdi, at stevningin frá fimm kommunustýrislimum skuldu geva steðgandi virknað fyri umval í Runavíkar kommunu.

Fyri at kæra málið til Eystara landsrætt krevst loyvi frá Procesbevillingsnævnet, sum nú hevur noktað umsóknini frá Fíggjarmálaráðnum. Sagt verður, at í slíkujm úrskurðum verður ikki grundgivið fyri avgerðini.

Sjálvt rættarmálið millum teir fimm kommunustýrislimirnar og Fíggjarmálaráðið um avgerðina at ógilda kommunuvalið í Runavíkar kommunu í 2024 og skriva út umval heldur fram í Føroya Rætti.