G7-londini vilja hava fleiri revsitiltøk

G7-londini, sum hava fundast í Týsklandi seinastu dagarnar, ætla at halda fram at leggja trýst á Russland, og vilja tey hava fleiri revsitiltøk sett í verk móti økjum, sum russiska stýrið í Moskva er bundið av.

Í felags fráboðan framgongur, at tey m.a. vilja banna ella minka so líðandi um innflutning av russiskari olju, skrivar Ritzau.

Tað eru uttanríkisráðharrar í teimum sjey londunum, sum eru millum heimsins ríkastu ídnaðarlond – Stórabretland, Kanada, Týskland, Frakland, Italia, Japan og USA – sum hava fundast seinastu dagarnar í norðurtýska býnum Weissenhaus.

Umframt at tey vilja hava fleiri revsitiltøk, vilja tey eisini framhaldandi veita Ukraina hernaðarligan stuðul, so leingi, sum hetta er neyðugt.