Ferðamannaskip til Funnings fríggjadagin

Ferðamannaskipið National Geographic Endurance hjá reiðarínum Lindblad Expeditions kemur til Funnings fríggjadagin 4. juli.

Skipið fer at liggja fyri akker uttanfyri bygdina, og teir 104 gestirnir verða førdir í land við smábátum. National Geographic Endurance er seinasta ferðamannaskipið at vitja í bygdini í ár. Tikið verður í mesta lagi ímóti trimum skipum um árið í Funningi.

Cruisetoymið, ið er samansett av fólki í Funningi, Runavíkar Havn og Visit Runavík, er sum altíð væl fyrireikað og til reiðar at taka ímóti bæði ferðafólkum, har megin parturin er USA, og manning, sigur Runavíkar Havn.

National Geographic Endurance varð liðugt bygt í 2021 og er 124 metrar langt. Fyrsti bátur kemur inn á land kl. 8.45.

Umboðsfelagið í Føroyum er Tor Shipping.