FarCargo sleppur ikki at lenda í Vágum í morgin

Eftir ætlan skuldi farmaflogfarið hjá FarCargo "Eysturoy" lenda í Vágum seinnapartin í morgin og aftur fríggjadagin.

Men tað verður av ongum, veit Dagur og vika í kvøld.

Tí hvørki loyvi fyribils ella endaligt loyvi frá ferðslustýrinum er komið uppá pláss, soleiðis at Boeing 757-200 flogfarið hjá FarCargo fær lent.

Í ferðslustýrinum verður arbeitt við bæði fyribils og varandi loysn. Henrik Ellermann, skrivstovustjóri í ferðslustýrinum, sigur við Dag og viku, at fyribils loyvi væntandi verður latið í hesari vikuni, men enn eru hvørki krøv ella treytir ásettar.