Alda Nielsdóttir
Hósdagin hittast ES-leiðarar á toppfundi í Brússel, og tá verða nýggj revsitiltøk móti Russlandi - sonevndi 19. revsipakkin - helst samtykt, sigur uttanríkisstjórin í ES, Kaja Kallas.
Hildið varð, at revsitiltøkini kundu verða samtykt í dag, tá uttanríkismálaráðharrar í ES hittast, men so verður ikki, sigur Kallas.
– Vit vænta at samtykkja 19. revsipakkan hesa vikuna. Tað verður tíverri ikki í dag. Men vit hava enn ein ES-toppfund hósdagin.
Endamálið við revsitiltøkunum er at leggja meira trýst á Russland fyri at fáa frið milum Russland og Ukraina.
Kallas sigur, at royndin hjá amerikanska forsetanum, Donald Trump at fáa frið í Ukraina er kærkomin, men ES sær eingi tekin uppá, at Russland ynskir frið.
– Russar samráðast bert, tá teir verða trýstir til tað. So vit umrøða, hvat meira vit kunnu gera, sigur hon sambært Ritzau.
Nýggju revsitiltøkini snúgva seg m.a. um at banna innflutning av russiskum náttúrugassi.
Vinarliga broyt tínar kennifíla - og privatlívsstillingar fyri at síggja hetta innihald