Elvdi til fluguplágu: Nú er seinasta ballan hjá IRF brend

Fyri páskir varð seinasta ballan við burturkasti í grótbrotinum úti á Vík í Leirvík brend. Hesum boðar IRF frá í tíðindaskrivi í dag.

Í 2018 varð Brennistøðin á Hagaleiti umvæld, og í tí sambandi lá hon still í fýra mánaðir. Í hesum tíðarskeiðinum varð alt brenniburturkastið ballað og lagt á goymslu í grótbrotinum úti á Vík. Hetta elvdi til sanna fluguplágu hjá fleiri Leirvík umframt, at fólk í Gøtu og Leirvík gjørdu vart við meira flugu enn vanligt.

Tilsamans vórðu 10.230 ballur lagdar á goymslu, og beint fyri páskir varð seinasta ballan koyrd í køstin á Brennistøðini.

Summarið 2018 (Mynd: Sverri Egholm)

- Tað hevur tikið longri tíð enn upprunaliga mett at brenna alt burturkastið á goymsluni, og hetta kemst m.a. av góðu gongdini í samfelagnum seinastu árini og methøgu burturkastnøgdunum, sigur IRF.

- Nú bar tó á mál, og tað síðsta av burturkastinum varð brent stutt fyri páskir.

IRF sigur, at umvælingin hevur eydnast væl, og IRF er farið frá at brenna 56 tons um samdøgrið til í miðal 78 tons um samdøgrið.