Christian Joensen tikið við rektarastarvinum á Kambsdali

Mikudagin tók Christian Joensen við farloyvisstarvinum sum rektari á Miðnámi á Kambsdali og Klaksvíkar HF-skeiði.

Fráfarandi rektarin Óli Wolles handaði nýggja rektaranum lykilin til skrivstovuna.

Christian Joensen, sum býr í Saltangará, er 51 ára gamal, útbúgvin sivilverkfrøðingur í 1999 og hevur m.a. eftirútbúgvingarskeið í námsfrøði, leiðslu og fíggjarstýring. Hann var lærari í støddfrøði á Handilsskúlanum fyri mongum árum síðan, og eftir fleiri ár hjá Føroya Tele hevur Christian aftur undirvíst á Miðnámi á Kambsdali hesi síðstu seks árini – nú í støddfrøði og alisfrøði. Umframt vanliga undirvísing hevur Christian Joensen røkt eina røð av øðrum uppgávum í skúlanum.

Christian Joensen avloysir Honnu Jensen, rektara, ið vegna tingarbeiði hevur fingið játtað farloyvi fram til summarið 2025. Síðan Hanna Jensen, rektari, fór aftur í Tingið, hevur Óli Wolles, vararektari, røkt rektarastarvið.