Innanlands

Carro flytir yvir á Háls nærhendis flogvøllin

Felagið hevur bygt nýggjan verkstaðsbygning fyri bygningin í Sandavági, sum brendi í 2017

2021-09-20 18:49 Author image
Tíðindaskriv
placeholder

Hósdagin letur Spf. Carro upp í nýggjum verkstaðsbygningi á Hálsi, beint við Vága Floghavn.

Í mars í 2017 brendi bilverkstaðið í Sandavági har sp/f Carro hevði havt sítt virksemi síðani 1992. Bygningurin var júst uppstigaður, so hettar var ein dyggur smeitur fyri felagið.

Carro flutti beinanveg í fyribils hølir í Miðvági og har hevur felagið húsast síðan.

Eftir at virksemi kom í gongd aftur, fóru fyrireikingarnar, at byggja ein nýggjan bygning í gongd. Arbeitt var við nógvum ymsum loysnum, og í 2019 keypti felagið eitt vinnuøkið á Hálsi, beint við Vága Floghavn. Økið er góðar 4.300 fermetrar til støddar.

Loysnin bleiv ein bygningur, sum tilsamans er góðar 900 fermetrar. Byggingin byrjaði á sumri í fjør og nú í vikuni, er klárt at flyta inn í bygningin.

Umframt alt mekaniskt arbeiðið, kemur Carro framyvir eisini at gera alt plátu/lakeringsarbeiðið og umvæla el-bilar. Nýggj lakeringsdeild, við klárgerðingarumstøðum og nýggjari sproytukabinu, er sett upp, og tískil eru góðar umstøður at gera tað arbeiðið. Lyftir og arbeiðsøkir eru serliga til el-bilar, og her kemur Carro at fáa góðkenning til el-bilar. Verkstaðið hjá Carro er eisini góðkent av Akstovuni til umsýn.

Felagið hevur góða arbeiðsmegi og at byrja við koma tað at verða fimm fólk í starvi. Væntast kann, at onkur legst afturat, tá virksemi er komi í gongd. Stjóri í Spf. Carro er Niels Nattestad.

Ætlanin er, at vísa bygningin fram og hátíðarhalda dagin tá eitt sindur av tíð er fráliðin.

Arbeitt verður í hesum døgum við at flyta út í nýggja bygningin. Sostatt fer alt virksemi hjá felagnum at halda til á Hálsi 2, frá hósdegnum 23. september. 

placeholder
placeholder