Innanlands

Borgarstjórin í Havn ynskir øllum eina góða ólavsøku

Á ólavsøku verður alt kegl og allar ósemjur gloymdar, sigur Annika Olsen

Savnsmynd

Savnsmynd

2018-07-27 15:31 Author image
Ari av Rana

- Aftur í ár fegnast vit tí um ólavsøkuna og síggja fram til at hitta ætt, vinir og kenningar í góðum lag hesar hásummardagarnar, ið vit veruliga gleða okkum til á hvørjum ári. Ólavsøkan er savnandi, hon fevnir okkum øll og ger ikki mun á nøkrum.

Soleiðis byrjar skriv frá Anniku Olsen, borgarstjóra í Havn, har hon ynskir øllum eina góða ólavsøku. Annika Olsen skrivar, at á ólavsøku verða allar ósemjur lagdar burtur:

- Øll tey spjøldur, vit seta á hvønn annan, og allir teir kassar, vit koyra hvønnannan í, eru burturi ólavsøkudagarnar, tá alt kegl og allar ósemjur eru gloymdar. Hesir dagar eru merktir av einum heilt serligum veitslu- og høgtíðsdámi, sum teljast millum bestu løtur á árinum.

- Tað er eisini hetta, ið eigur at eyðmerkja okkum sum tjóð, at vit megna at standa saman og at hava nakað saman, og at vit ikki skammast við tað, vit hava felags. Tvørturímóti kunnu vit samgleðast um okkara góða land, okkara ungdóm og teir góðu ókomnu dagar, Føroyar og føroyingar eiga úti í framtíðini.

Ólavsøkan er eisini fyri øll, og eingin munur verður gjørdur á fólki. Hon er høgtíðin hjá børnum, vaksnum, ungum og eldri. Eingin ólavsøka er lík aðrari. Hvør einasta er ein nýggj ólavsøka, við sínum egna lívi og skapi, skrivar borgarstjórin í Havn.

- Vit lata dyrnar upp á víðan vegg og eru til reiðar at taka ímóti gestum, tí Havnin er ikki bara høvuðsstaður okkara, ið her búgva, men høvuðsstaður hjá øllum føroyingum. Vit vilja fegin, at øll skulu hava tað gott í Havn hesar dagarnar og gleðast um øll, ið gera okkum tann heiður at vitja.

Við hesum bjóðar Annika Olsen, borgarstjóri í Havn, øllum eina góða ólavsøku.

placeholder
placeholder