Bjarni er nýggjur maður á tingi

Í dag var greitt, at Mentamálaráðið verður býtt millum nýggju landsstýriskvinnuna Honnu Jensen og landsstýrismannin í fiskimálum, Høgna Hoydal.

Nú Hanna Jensen fær ábyrgdina av skúlamálum, kemur næsta fólk á listanum hjá Framsókn á ting. Tað er Bjarni Kárason Petersen, sum til løgtingsvalið í 2015 fekk 135 atkvøður og gjørdist nummar fýra á listanum hjá Framsókn.

Nummar eitt á listanum, Poul Michelsen, er landsstýrismaður í uttanríkis- og vinnumálum, og nú Hanna Jensen eisini gerst landsstýriskvinna, verður tað Bjarni Kárason Petersen, sum røkir eina sessin á tingi fram til næsta løgtingsval.