18 nýggjar leiguíbúðir í miðbýarøkinum í Runavík

Talan er um eina verkætlan mitt í hjartanum í Runavík, og verða tær 18 íbúðirnar væntandi klárar at flyta inn í á sumri 2027, skrivar LÍV í tíðindaskrivi.

– LÍV samtakið arbeiðir miðvíst við at gera íløgur innan leiguíbúðarmarknaðin í Føroyum, og er avtalan um íbúðarverkætlanina í Runavík enn ein liður í hesum arbeiði.

– Hetta er eitt neyðugt stig, tí sambært Búskaparráðnum er bústaðartrotið í Føroyum vorðið ein týðandi fløskuhálsur, ið er við til at forða fyri framhaldandi fólka- og búskaparvøkstri.

Íbúðarverkætlanin í Runavík er triðja sjálvstøðuga íbúðarverkætlanin hjá LÍV Fastogn, og við hesi verkætlan verður LÍV Fastogn eigari av 104 leiguíbúðum í Føroyum.

Komandi heyst verður møguligt hjá øllum at skriva seg á bíðilista. Grundað á, at íløgurnar eru gjørdar fyri eftirlønaruppsparing hjá kundunum hjá LÍV, fáa hesir tó eisini framíhjárætt til íbúðirnar.

LÍV Fastogn er partur av LÍV og ger íløgur í íbúðir og aðra fastogn í Føroyum. Endamálið er at spjaða íløgurnar hjá kundunum og samstundis tryggja, at eftirlønaruppsparingin kemur kundunum og føroyska samfelagnum sum heild til góðar, skrivar LÍV.

Neyvari kunning um íbúðarverkætlanir hjá LÍV Fastogn er at finna á livfastogn.fo.