12 umsóknir til starvið sum stjóri í Heilsustýrinum

Herfyri varð søkt eftir nýggjum stjóra til Heilsustýrið, nú setanartíðarskeiðið hjá verandi stjóra gongur út, og Heilsumálaráðið hevur fingið 12 umsóknir til starvið.

Freistin at søkja var í gjár, 15. oktober.

Talan er um bæði kvinnur og menn, sum hava søkt, skrivar Heilsumálaráðið, sum í næstum fer undir at viðgera umsóknirnar.

Nýggi stjórin í Heilsustýrinum fær ábyrgdina av dagligu leiðsluni, menningini og rakstrinum av stovninum, sum er ein sjálvstøðugur myndugleikastovnur undir Heilsumálaráðnum. Heilsustýrið hevur høvuðsuppgávuna at skipa og menna heilsufakliga økið í Føroyum og at veita granskingargrundaða ráðgeving við støði í føroyskum heilsu- og samfelagsviðurskiftum.

Bjarni á Steig hevur verið stjóri í Heilsustýrinum seinastu árini.