Ruth Vang: - Einki sum talar fyri einum statsláni

 - Ja, eg rokni við at Sambandsflokkurin nýtir hetta til at vísa á, hvat vit kunnu fáa burturúr at vera í einum ríkjafelagskapi. Men also, tað valdast jú øðiliga nógv um, hvørjar treytir eru galdandi hinvegin; um hetta er áhugavert ella ikki.

Soleiðis segði Ruth Vang, tá FM1 og Portalurin í vikuni spurdu landsstýriskvinnuna í fíggjarmálum, hvørt eitt danskt statslán í sambandi við Suðuroyartunnilin kemur uppá tal ella ikki. 

Hetta var í sambandi við skrivið frá Vinstra-flokkinum í Danmark og Sambandsflokkinum í vikuni. Landsstýriskvinnan og forkvinnan í Framsókn segði, at hetta als ikki hevur verið umrøtt í landsstýrinum. Eisini helt Ruth Vang fyri, at henni hóvaði ikki tankan um hetta.

Hoyr eisini: - Mær hóvar ikki slíka politiska íblandan úr Danmark

Soleiðis ljóðaði boðskapurin hjá Ruth Vang aftur í dag, tá hon á tingsins røðarapalli svaraði hesum spurningunum frá formanninum í Sambandsflokkinum í sambandi við munnligu fyrispurningarnar: 

 1.Ætlar landsstýriskvinnan at viðgera møguleikan fyri donskum statsláni, um Suðuroyartunnilin gerst veruleiki?

2.Hvørjar hugsanir hevur landsstýriskvinnan um at taka danskt statslán til fígging av føroyskum verkætlanum?

- Alt kann kannast, men tað er einki, sum talar fyri einum statsláni, segði landsstýriskvinnan.

Ruth Vang, og nakrir viðmerkjarar úr salinum, vístu á tað sama, sum Johnny í Grótinum hevur gjørt í skrivi og í viðmerking: At Danmark hevur latið Grønlandi eitt lán til flogvøll, sum hevði eitt rentuískoyti, á 1,45 prosent. 

- Hetta merkir, at tað er dýrari, enn tað sum Landsbankin kann veita.

Hoyr samrøðu við formannin í Búsakparráðnum um statslán her: - Tað veldst um ískoytisrentuna

Troels Lund Poulsen, formaður í Venstre, Anna Falkenberg, fólkatingslimur og nærtforkvinna hjá Sambandsflokkinum, og Bárður á Steig Nielsen, formaður Sambandsfloksins, hava lagt eitt uppskot fram 

Johnny í Grótinum vísti tó eisini á, at danski staturin megnar at skaffa nógv bíligari lán, enn føroyski landskassin megnar. Og tað var eisini boðskapurin hjá Bárði á Steig Nielsen og partvíst hjá tinglimum í Fólkaflokkinum:

- Vit mugu taka bíligasta lánið, vit kunnu fáa. Allir møguleikar skulu vera á borðinum.

Í mun til málið um flogvøllin í Grønlandi, segði Bárður á Steig Nielsen, at tað eisni snýr seg um kreditrating: Har standa Føroyar betri enn Grønland.

Ikki óvæntað er Tjóðvaldi hart ímóti statsláni frá Danmark: 

-  Vit hava gjørt allar aðrar undirsjóvartunnlar, eftir at blokkurin varð skorin kraftiga, segði Høgni Hoydal

- Tað er næstan flovisligt.  Pínligt at okkara høga ting skal kjakast um at lána pengar frá einum øðrum stati. Bíligast er ikki altíð best: Hvat um vit tóku lán við negativari rentu frá Russland, spurdi Erling Eidesgaard retoriskt.

Sí eisini: - Sambandsflokkurin ræðist orð

Dagført: 17.29