Zelenskyj: Ukraina fær nýggjan verjumálaráðharra

Ukraina skal hava nýggjan verjumálaráðharra.Tað boðaði ukrainski forsetin, Volodymyr Zelenskyj frá sunnukvøldið.

Ætlanin er, at núverandi verjumálaráðharrin, Oleksij Reznikov verður skiftur út við Rustem Umerov. Forsetin fer at heita á tjóðartingið um at góðkenna útskiftingina í vikuni, og væntandi ferð ein meiriluti at stuðla Zelenskyj í hesum.

Reznikov hevur verið gjøgnum fleiri enn 550 dagar við kríggi, og hevur verjumálaráðið tørv á nýggjum tilgongdum, sigur Zelenskyj m.a.

Sambært Ritzau er talan um størstu broyting í ukrainsku verjuleiðsluni, síðan Russland gjørdi innrás í februar 2022. Reznikov hevur verið verjumálaráðharri síðan november 2021.

Rustem Umerov stendur í dag á odda fyri størsta privatiseringsgrunninum í Ukraina, og eisini hevur hann áður sitið í tjóðartinginum. Hann var eisini ein av samráðingarmonnunum, sum fundaðist við Russland um eina møguliga vápnahvíld og friðaravtalu, stutt eftir, at kríggið byrjaði. Í fjør var hann eisini við til at fáa í lag avtaluna um útflutning av ukrainskum korni umvegis Svartahavið.