USA og Kina samd um at lækka tollin í 90 dagar

USA og Kina eru vorðin samd um at lækka tollavgjøldini á vørurnar hjá hvørjumøðrum í 90 dagar.

Tað framgongur í felags fráboðan í dag, eftir samráðingarnar, sum hava verið millum londini um vikuskiftið.

Á fundinum í Geneve vóru amerikanski fíggjarmálaráðharrin Scott Bessent og kinesiski varaforsætisráðharrin He Lifeng. Hetta var fyrstu ferð, at umboð fyri USA og Kina hittust at umrøða handil, síðan Trump legði fram tollgjøldini á útlendskar vørur fyrst í apríl.

Amerikanski fíggjarmálaráðharrin sigur, sambært CNN, at tollurin lækkar 115 prosent.

Hetta merkir, at tollurin á kinesiskar vørur, sum verða innfluttar til USA, verður 30 prosent heldur enn 145 prosent, og at tollurin á amerikanskar vørur, sum verða innfluttar til kina lækkar úr 125 niður í 10 prosent. Hetta verður galdandi frá 14. mai.