Tvær dronur skotnar niður í Russlandi í nátt

Russiska loftverjuskipanin hevur í nátt varnast skotið niður tvær ukrainskar dronur yvir Kaluga- og Istra-landslutunum.

Tað upplýsir russiska verjumálaráðið og borgarstjórin í Moskva, Sergej Sobjanin, sambært Reuters tíðindastovuni.

Kaluga liggur í ein útsynning úr Moskva, meðan Istra liggur í Moskva-økinum, umleið 65 kilometrar í ein útnyðring úr høvuðsstaðnum.

Á boðtænastuni Telegram skrivar Sergej Sobjanin, at dronurnar “royndu at fremja eitt álop á Moskva”.

Onki stendur um, hvussu hann kundi vita tað. Sambært borgarstjóranum eru enn ongi boð komin um, at nakar hevur fingið skaða í sambandi við at dronurnar vórðu skotnar niður.

Verjumálaráðið upplýsir, at dronan í Kaluga-økinum varð oyðiløgd umleið klokkan 03 lokala tíð í nátt.

Tað er næstan daglig hending, at Russland boðar frá, at tey hava skotið ukrainskar dronur niður í russiskum øki. Ofta hava dronurnar flogið yvir ella nærhendis Krim-hálvoynni og Moskva.

Krim varð hertykin av Russlandi í 2014 og verður mett sum russiskt øki. Flest onnur lond meta hálvoynna at hoyra til Ukraina.