“Trøllabeiggi” væl umtóktur í India og USA

Filmurin “Trøllabeiggi” hjá Gudmundi Helmsdal varð fyrstu ferð sýndur á Geytakvøldinum í fjør, og tað kvøldið endaði hann eisini við at vinna Áskoðaravirðislønina á 25.000 krónur. Í dag hevur stuttfilmurin vunnið 18 virðislønir á filmsfestivalum kring heimin.

Stuttfilmurin, sum á eingilskum verður nevndur “Brother Troll”, er 30 minuttir langur og snýr seg um tveir brøður, sum búgva einsamallir í einum fjarskotnum dali og stríðast fyri tilveruni og sambandinum sínamillum, eftir at teir hava mist elsta beiggjan. Leikarar eru Nicolaj Falck og Búi Dam.

Tað var í oktober í fjør, at Gudmund Helmsdal byrjaði at senda filmin út til ymiskar festivalar, og síðan januar er filmurin sloppin við á 21 festivalar, harav fleiri, ið ikki kunnu avdúkast enn.

– Tað, sum er mest umráðandi er, at filmurin kemur út; tað at eg kann prógva at fólk kring heimin hava hug at síggja mín film, sigur Gudmund Helmsdal við Blaðið Vikuskifti.

Les ella samrøðuna ókeypis í Blaðnum Vikuskifti her