Torkil Vestergaard Rasmussen nýggjur deildarstjóri í Uttanríkis- og mentamálaráðnum

Torkil Vestergaard Rasmussen er settur sum deildarstjóri á Mentanardeildini í Uttanríkis- og mentamálaráðnum. Hetta skrivar uttanríkis- og mentamálaráðið á heimasíðu sínari.

Torkil V. Rasmussen er 37 ára gamal og útbúgvin cand. jur. í 2012 frá Københavns Universitet. Torkil er ikki heilt ókendur í ráðnum. Hann hevur átta-ára royndir sum fulltrúi í Landsfyrisitingini, harav 5 ár í Mentamálaráðnum. Í Mentamálaráðnum hevur Torkil Rasmussen millum annað arbeitt við løgfrøði innan mentanarøkið og ráðgivið leiðsluni.

Um deildina skrivar ummr.fo soleiðis:

- Deildin hevur ábyrgdina av tí fakliga og politikkfyrireikandi arbeiðinum í breiðum týdningi innan mentanarøkið, sum fevnir um mentan, list, mentanararv, søvn, ítrótt, fjølmiðlar, kirkju og onnur trúarsamfeløg.

Torkil V. Rasmussen tekur við starvinum tann 1. mai 2021.