Sólin skínur á Tórshavnar jazz, fólka- og blues festival

Endurstovnaði festivalurin verður hildin í Havn um vikuskiftið, og millum tey framførandi teljast GØ, gówa, Play Boys við James Olsen á odda, Guðrun Sólja Jacobsen, duoin Katari og gospelkórið Brak.

Høvuðsnavnið á festivalinum verður 50 ára gamla Tórshavnar Big Band – flaggskipið innan jazz í Føroyum – sum fer at spæla konsertina ”Minnist tú enn”  saman við stjørnusolistunum Kristinu Bærendsen, Carlsen systrunum og øðrum.

Tónleikalegendan Brandur Øssursson tók upprunaliga stig til Tórshavnar jazz, fólka – og blues festival í 1984, og hann helt fram í 20 ár. Festivalurin setti ein heilt serligan dám á býarlívið í Havn um summarið og var savningarstaður hjá tónleikalívinum, havnafólki og vitjandi. Tórshavnar Big Band var fast húsorkestur, og saxofonspælandi jazz-hvalurin, sum var búmerkið tá, var eyðkennið fyri ein altjóða jazzfestival í norðuratlandshavinum.

Skráin til hendan fyrsta festivalin verður ein blandingur av jazzi, fólkatónleiki og blues. Stórur dentur er lagdur á listaligu góðskuna, og skráin umboðar tað besta, sum Føroyar hava at bjóða.

- Vit arbeiða fyri at betra um umstøðurnar hjá tónleikagreinunum og tryggja, at føroyska tónleikalívið er burðardygt, fjølbroytt, viðkomandi og í støðugari, skjótari menning, siga stigtakararnir Sunnuva Bæk og Hans Petur í Brekkunum.

Fríggjadagin kl. 17 verður festivalsetan í Blábar og beint eftir setanina verður borðreitt við grillaðum jazzlambi og blues tilhoyri.

Konsertir og jamsession verða í Reinsarínum, í Havnar kirkju, í Perluni, í Blábar og í Norðurlandahúsinum. Øll skráin sæst á facebook síðuni hjá Tórshavnar jazz, fólka og blues festivali.