Skuldsettur fyri harðskap móti løgreglufólki

Ein maður varð í nátt handtikin og skuldsettur fyri harðskap móti einum løgreglufólki.

Maðurin varð fyrst burturvístur av einum bústaði í Havn fyri at vera til ampa, og seinni fekk løgreglan eina fráboðan um órógv við eitt skeinkistað í Havn. Tá løgreglan kom á staðið vísti tað seg, at tað var sami maður, og fekk hann eina bót fyri brot á skilhaldsreglurnar.

Maðurin gjørdist harðligur, og endaði tað við, at hann varð handtikin. Hann liggur enn á støðini, og er hann nú skuldsettur fyri harðskap móti einum løgreglufólki, sigur vaktleiðarin á løgreglustøðini í Havn í morgun.