Ófráboðaðir fyrispurningar á tingi í dag

Ófráboðaðir fyrispurningar til løgmann og landsstýrisfólk er á skránni, tá løgtingið kemur saman til fundar klokkan 11 í dag.

Sambært tingskipanini kunnu ófráboðaðir spurningar ”...í mesta lagi vara tilsamans 1 tíma og, hvør spurningur má í mesta lagi vara í 10 minuttir”.

Eftir spurnarumfarið skal tingið taka støðu til um serlig grein 25-nevnd skal setast at viðgera broytingar í stýrisskipanarlógini. Í farnu viku viðgjørdi tingið uppskot frá tveimum tingkvinnum, Ingilín D. Strøm og Hervør Pálsdóttir, um at broyta heiti hjá tinglimum, so at tey ikki skulu kallast ’-maður’.

Í sambandi við viðgerðina legði løgmaður eisini upp til, at tíðin kanska er komin til aðrar broytingar í stýrisskipanir eisini.

Les eisini: Grein 25-nevnd setast at viðgera heitið ’maður’ 

Fleiri onnur mál eru eisini á skránni í dag, harímillum fyrstu viðgerðirnar av tveimum uppskotum frá Javnaðarflokkinum um at forða fyri, at dagpeningur verður tikin frá fólki, sum eru rakt av langtíðarsjúku.

Tingfundurin byrjar kl. 11