Nýtt gistingarhús ávegis í Klaksvík

Tvey nýggj hotell verða bygd í høvuðsstaðnum samstundis sum Hotel Føroyar byggir út, og verður dupult so stórt.

Men í Klaksvík hava tey eisini mót upp á ferðavinnuna. Í øllum førum eru tað fólk, sum arbeiða við at byggja hotell við 80 kømurum fyri einar 110 milliónir krónur. Tað sigu ein teirra, sum fæst við fyrireikingarnar, við útvarpið í dag.

Ætlanin er at byggja hotellið á útfyllingini í miðbýnum.

Kringvarpið veit, at fyritøkur í Klaksvík og norðuri í Eysturoynni eru spurdar um tær vilja vera við, og nakrar teirra hava játtað.