Nýggi landsstýrismaðurin í fiskivinnumálum tók við í gjár

Í gjár, týsdagin 17. september var fyrsti arbeiðsdagur hjá nýggja landsstýrismanninum í fiskivinnumálum, Jacob Vestergaard. Í hesum sambandi var skipað fyri samkomu í Fiskimálaráðnum, har starvsfólkini fingu høvi at heilsa uppá nýggja landsstýrismannin og ynskja honum vælkomnum, skrivar heimasíðan hjá Fiskimálaráðnum.

Høgni Hoydal, nú fyrrverandi landsstýrismaður í fiskivinnumálum, var hjástaddur, og nýtti hann eisini høvi at ynskja nýggja landsstýrismanninum góða eydnu í starvinum.

Aðalstjórin í Fiskimálaráðnum flutti fram røðu og ynskti eisini nýggja landsstýrismanninum vælkomnum. Síðani nýtti aðalstjórin høvi vegna starvsfólkini at takka Høgna Hoydal fyri gott samstarv seinastu fýra árini.