Jarðarferðin hjá Bænadikt páva verður hósdagin

Tað var 31. desember, at fyrrverandi pávin, Bænadikt XVI andaðist, 95 ára gamal, og Vatikanið upplýsir, at hann skal jarðast hósdagin 5. januar.

Núverandi pávin, Frans fer at standa á odda fyri einum minningarhaldi í sambandi við jarðarferðina, sum eftir ynskinum frá Bænadikt XVI verður hátíðarligt og einfalt.

Vatikanið hevur almannakunngjørt myndir av fyrrverandi pávanum, sum skal liggja í kapellinum í Pæturskirkjuni á lit de parade í tríggjar dagar, so almenningurin fær høvi at siga honum eitt seinasta farvæl. Sambært Ritzau eru nógv fólk eisin savnað uttanfyri kirkjuna í hesum sambandi.

Bænadikt XVI, sum varð føddur í Týsklandi og er doyptur Joseph Ratzinger, tók við sum pávi í 2005 eftir Jóhannes Páll II, men átta ár seinni, í februar 2013, legði hann frá sær av heilsuávum. Hann var tann fyrsti pávin í uml. 600 ár at leggja frá sær. Tí er tað eisini rættiliga óvanligt, at núverandi pávin luttekur í jarðarferðini hjá einum fyrrverandi páva.