Indari sendur í rúmdina fyri fyrstu ferð í 40 ár

Fyri fyrstu ferð síðan 1984 hevur India nú sent fólk út í rúmdina. Í dag varð indiski Shubhanshu Shukla sendur út í rúmdina saman við astronautum úr Póllandi, Ungarn og USA.

Pólland og Ungarn hava heldur ikki havt fólk í rúmdini í yvir 40 ár, og Shubhanshu Shukla er bert tann næsti indarin, sum verður sendur út í rúmdina, skrivar BBC.

Rúmdarfarið hjá privatu fyritøkuni Axiom Space hevur kós móti altjóða rúmdarstøðini (ISS). Ferðin er fyriskipað í samstarvi við amerikanska rúmdarstovninum Nasa, indiska Isro, evropeiska ESA, og amerikanska SpaceX.

Eftir ætlan skal Shukla luttaka í fyrstu mannaðu rúmdarferðini hjá India nakrantíð í 2027. Eisini hevur India ætlanir um at seta upp eina rúmdarstøð og senda astronautar til Mánan áðrenn 2040.

Frá vinstru: Shubhanshu Shukla (India), Tibor Kapu (Ungarn), Peggy Whitson (USA), og Slawosz Uznanski-Wisniewski (Pólland) (Mynd: EPA)