Grindin í Sandavági: Sjey hvalir til Klaksvíkar

Grindaformenninir í Norðoyggjum sýta fyri at drepa grind, í sambandi við at grindaformaðurin í Hvannasundi er meldaður í sambandi við eitt grindadráp, sum var í 2024.

Fyri kortum lat man eina grind, sum var sædd av Viðareiði, fara, og tískil eru tað møguliga norðoyingar, sum sóknast eftir einum kóki.

Sí eisini: Lótu grind fara í Norðoyggjum

Og í dag er ein møguleiki. Í sambandi við grindina í Sandavági í gjár, 125 hvalir og 809 skinn, verða sjey hvalir sendir til Klaksvíkar.

- Røktarheimini og sambýlini fáa fyrst og siðani verður tað eftir først til mølle prinsippinum, sigur Karl Johansen við Norðlýsið.

Fólk kunnu møta upp í klaksvíksgarðinum eftir klokkan 16. Ungir dreingir skera grindina upp, so tað er bert neyðugt at møta upp við ílæti, staðfestir borgarstjórin í Klaksvík.

Umframt drápspartarnar vóru eisini heimapartar til húskini í Vága og Sørvágs kommunu.