Fyrsta flagið verður loyst í morgin

Á middegi í morgin verður sjøtul settur á arbeiðið at gera nógv umrøddu tunlarnar Norður um Fjall. Tá byrjar arbeiðið at gera arbeiðsvegir til komandi tunnilsmunnarnar.

Landsverk skipar hátíðarhaldi fyri innbodnum í Ánunum, har annar tunnilin, Árnafjarðartunnilin fer inn.

Arbeiðið sum verður mett at taka fýra ár, fevnir um tveir tunlar. Annar úr Ánunum til Árnafjarðar, og hin úr Árnafirði og til Norðdepil.

Nýggi Árnafjarðartunnilin verður umleið 1900 metrar langur og níggju metrar breiður. Nýggi Hvannasundstunnilin verður umleið 2200 metrar langur og níggju metrar breiður.

Í Ánunum skulu gerast umleið 500 metrar av vegi. Í Árnafirði skulu gerast umleið 500 metrar av vegi ímillum tunlarnar, og í Norðdepli skulu gerast umleið 900 metrar av vegi. Afturat tí verða nýggjar íbindingar gjørdar í Árnafirði og til gomlu tunlarnar, har gjørdir verða umleið 1000 metrar afturat av nýggjum vegi.