Edith Mørkøre í Smiðjuni í Lítluvík

Í døgunum frá 1. til og við 6. mai sýnir Edith Mørkøre fram sína list í Smiðjuni í Lítluvík. 

Framsýningin hevur heitið ”Varðar”. Dyrnar lata upp seinnapartin í dag kl. 16, og borðreitt verður við góðum til góman. 

Edith sigur soleiðis um framsýningina:

- Í náttúruni lata mínir tankar seg skiftandi upp og aftur, í takt við egnan andadrátt. Varðar vísa veg yvir fjøll og geva vón.

- Eg finni íblástur til mítt listarliga arbeiði í føroysku náttúruni, í fólkinum, sum her býr, í vøkstrinum, í fuglalívinum, í strukturunum í náttúruni, í skiftandi veðurlagnum og í gerandisdegnum...

 Edith Mørkøre er autodidakt, sjálvlært, listafólk og hevur seinastu mongu árini havt listina, sum sítt høvuðs­starv. Hon hevur við jøvnum millumbili havt sjálvstøðugar framsýningar, luttikið á felagsframsýningum og sensureraðum fram­sýningum her heima og uttanlands. 

Framsýningin er opin til klokkan 19 í kvøld. Fríggjadagin millum 12 og 19, leygardagin 12 til 18, sunnudagin 14 til 18 og mánadagin og týsdagin millum klokkan 12 og 18.