Earth Hour í Vági

Vágs Kommuna er aftur í ár við í Earth Hour, heimsins størsta verðurlags tiltak, sum WWF stendur fyri.

Tiltakið varpar ljós á verðurlagsbroytingar og umhvørvi, og hetta verður gjørt við at heita á heimsins borgarar um at sløkkja ljósini í ein tíma.

Earth Hour verður leygarkvøldið 26. mars millum klokkan 20.30 og 21.30. Hendan tíman sløkkir Vágs kommuna gøtuljósini í Vági, og heitur kommunan á borgarar um eisini at sløkkja ljósini. Hendan tíma hava vágbingar so tann sjáldsama møguleika at uppliva Vág í myrkri, og um viðrar, verður skipað fyri gongutúri niðan á Gjógvaráfjall, skrivar Vágs kommuna.

Við á túrinum er Mortan Mortensen og gingið verður frá plantaguni klokkan 19.30. Uppi á Gjógvaráfjallið fáa gongufólkið so møguleika at síggja útyvir Vág og Vágsfjørð uttan órógv frá ljósinum frá bygdini. Vágs kirkja hevur aftankvirru, og kirkjan verður bert lýst upp við livandi ljósum.