Danmark ætlar at banna koran-brenning

Danska stjórnin hevur í kvittanum at koma við einum lógaruppskoti, sum skal gera tað ólógligt at brenna koranina á mótmælistiltøkum.

Serliga Danmark og Svøríki eru komin í trupulleikar uttanríkispolitiskt orsaka av fleiri mótmælisgongum móti islam, har koranin, sum er heilaga skriftin hjá muslimum, er brend.

Í gjár boðaði danski uttanríkisráðharrin, Lars Løkke Rasmussen, frá, at ætlanin er at koma við einum lógaruppskoti í heyst, sum skal forða fyri hesum.

Í dag fingu umboð fyri flokkarnar á fólkatingi eina kunning um ætlanina, men enn er ikki komið fram í staklutum, hvat tað er, sum ætlanin er at gera.

Uppskotið kemur eftir at ein røð av muslimskum londum hava mótmælt hendingunum, sum eru farnar fram framman fyri sendistovunum hjá hesum londum í Danmark og Svøríki. Í dag verður málið viðgjørt í millumtjóða felagsskapinum OIC (Organisation of Islamic Cooperation), har 57 muslimsk lond eru limir.

Sambært Lars Løkke Rasmussen er ynskið hjá stjórnini at vísa politiskan vilja til at taka trupulleikan í álvara. Hetta er ikki tí, at stjórnin kennir seg trýsta til tað, segði hann við tíðindafólk uttan fyri Christiansborg í dag.

- Tað er tí at vit hava gjørt eina politiska meting av, hvat er til gagns fyri okkum øll. Tað snýr seg um at røkja donsku áhugamálini úti í heimi, og eisini  trygdina hjá okkara borgarum. Men eisini geopolitisku støðuna, vit eru í í løtuni við kríggi í Ukraina og við londum sum Russlandi, sum eru við at birta uppundir ótryggleikan, segði Lars Løkke Rasmussen.

Stjórnin hevur nú sett løgfrøðingarnar í løgmálaráðnum til at finna út av, hvussu eitt bann kann orðast.

Stjórnin skal ikki rokna við at fáa stóra undirtøku fyri einum slíkum uppskoti á fólkatingi. Bæði úr høgru og vinstru síðu siga politikarar, at tað er skeivt av stjórnini at skerja framsøgufrælsið og geva seg undir trýst frá harðræðislondum. 

Kring allan muslimska heimin eru fólk farnar út á gøturnar fyri at vísa sína ónøgd yvir, at Danmark og Svøríki loyvir fólki at brenna teirra heilagu bók (Mynd: EPA)