Bjóða til bronsudyst klokkan 16

Føroyar spæla bronsudyst móti Svøríki í dag klokkan 16. U21 menninir hava klárað seg søguliga væl og áhugin hevur verið ovurhonds stórur.

Kommunur kring landið hava skipað fyri stórskíggjatiltøkum, og nú verður bjóðað til veruliga hondbóltsveitslu við Tjarnir.

Í sambandi við Voxbotn, sum orsakað av veðri var í høllini við Tjarnir leygarkvøldið, eru stórskíggjar settir upp, og somu stórskíggjar fara í dag at vísa bronsudystin hjá Føroyum.

Fyriskipararnir av Voxbotn bjóða øllum at hyggja, og tað verður ókeypis atgongd. Møguleiki verður at keypa sær okkurt lætt at eta og drekka. Dyrnar lata upp ein tíma undan dystarbyrjan.

Voxbotn vónar at nogv fólk koma at hyggja.

Bronsudysturin millum Føroyar og Svøríki byrjar sunnudagin klokkan 16.