Bilurin endaði á takinum

Seinnapartin í gjár varð ringt til løgregluna at boða frá einum ferðsluóhappi á Nesi í Vági.

Talan var um ein bil, sum var farin út av vegnum og var endaður á takinum. Førarin var einsamallur í bilinum.

Løgregla, sjúkrabilur og sløkkilið vórðu boðsend, og við vegleiðing frá bjargingarfólki, slapp bilførarin skjótt úr bilinum, sigur vaktleiðarin á løgreglustøðini í Havn.

Førarin var væl fyri og hevði ikki fingið nakran stóran skaða, men hann varð tó koyrdur á sjúkrahúsið til kanningar.

Orsøkin til óhappið var, at bilførarin hevði mist tamarhaldið á bilinum, og var førarin ikki ávirkaður, sigur vaktleiðarin.