Barnagarðsdreingir við áheitan til borgarstjóran í Eysturkommunu

- Í dag var forkunnug vitjan í býráðshúsinum í Eysturkommunu.

Hetta skrivar heimasíðan hjá kommununi seinnapartin. Talan var tó ikki um nakað "stórt útlendskt navn" ella kanska løgmann.

Tað vóru ungir borgarar í kommununi - sum høvdu eitt ynski.

Talan var um børn úr dagstovninum Brúsa í Leirvík, sum í morgun vóru Norðragøtu og handað borgarstjóranum eina undirskrivaða áheitan um ein lítlan sparkivøll.

13 dreingir høvdu undirskrivað pappírið, ið sæst niðast. Teir staðfesti, at teir gjarna vilja hava betri umstøður at sparka bólt, meðan teir eru í skúla: Millum annað at hava mál. Har var eisini uppskot um staðsetingina í garðinum.

Borgarstjórin lurtaði, tók ímóti og bjóðaði sleikisneis.

- Per Martin Gregersen, borgarstjóri, takkaði fyri skrivið og segði børnunum, at hann skuldi fara at vita, um tað ikki man fara at bera til, at fáa ein lítlan vøll inni í garðinum, skrivar Eysturkommuna.