– Russland fer ikki at leypa á Nato-øki

Russland fer ikki at leypa á Nato-øki, sigur amerikanski forsetin, Donald Trump, eftir at stjórin fyri CIA, John Ratcliffe í vikuni hevur vitjað í russiska høvuðsstaðnum Moskva.

Tá Trump hósdagin varð spurdur av journalistum, um Ratcliffe fór til Russlands fyri at ávara russar ímóti at leypa á Nato, hevði hann onga viðmerking, men hann legði afturat, at hann sjálvur hevði havt góðar samrøður við russiska starvsbróðir sín, Vladimir Putin.

Seinasta alment fráboðaða vitjanin hjá einum CIA-stjóra í Moskva var í november 2021 - tríggjar mánaðir undan russisku innrásini í Ukraina, sum landið framvegis er í kríggj við, skrivar Reuters. Tá hitti táverandi CIA-stjórin William Burns Vladimir Putin.

Sambært Trump var einki óvanligt við vitjanini hjá Ratcliffe.

– Ratcliffe hittir russiska starvsbróðir sín eina ferð hvørt hálvár ella hvørt ár. Tey hava eitt sera gott samband. Har vóru eingi boð ella nakað óvanligt, sigur amerikanski forsetin.