Uttanlands

– Nú skulu Svøríki og Finnland upp í Nato

Tað eru bert Ungarn og Turkaland, sum ikki hava góðkent umbønina hjá Svøríki og Finnlandi um limaskap, og sambært Jens Stoltenberg, Nato-aðalskrivara, hava tey bæði norðurlendsku londini livað upp til sín part av avtaluni, sum var gjørd við Turkaland í juni

Jens Stoltenberg, aðalskrivari hjá verjusamgonguni Nato (Mynd: EPA)

Jens Stoltenberg, aðalskrivari hjá verjusamgonguni Nato (Mynd: EPA)

2022-11-21 13:55 Author image
Alda Nielsdóttir
placeholder

Krøvini til Svøríki og Finnland fyri at gerast partur av Nato eru gingin á møti, og nú eiga londini at sleppa uppí felagsskapin, sigur Jens Stoltenberg, aðalskrivari.

Fyri at tey bæði norðurlendsku londini kunnu gerast limir, krevst undirtøka frá øllum teimum núverandi Nato-londunum, sum eru 30 í tali. 28 av teimum hava formliga góðkent umbønina hjá Svøríki og Finnlandi, og nú eru bert Ungarn og Turkaland eftir.

Í røðu, sum Stoltenberg helt í Madrid, vendi hann sær serliga til Turkaland.

– Á Nato-toppfuninum í Madrid í juni, varð avtala gjørd millum Turkaland, Svøríki og Finnland, og Svøríki og Finnland hava gjørt sín part. Nú er tíðin komin til at enda tilgongdina, so vit kunnu bjóða Svøríki go Finnland vælkomin.

Tað er serliga Turkaland, sum verður sæð sum ein møgulig forðing fyri Nato-limaskapi til Svøríki og Finnland. Í Ungarn skulu tey eftir ætlan atkvøða um at góðkenna umbønirnar um limaskap 7. desember, men turkar hava enn ikki boðað frá nakrari ætlan, skrivar Ritzau.

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder