– Iranska stýrið er óndskapurin sjálvur

Avgerðin hjá amerikanarunum um at leypa á Iran var ein røtt avgerð, sigur danski verjumálaráðharrin, Troels Lund Poulsen.

– Tað snýr seg ikki bert um støðuna í Iran men um støðuna í Miðeystri sum heild, sigur hann og leggur afturat, at tað er ein torfør men neyðug støða.

– Er tað skilagott, at amerikanarar gera, sum teir gera nú? Ja, tað haldi eg, sigur hann við danskar miðlar.

Danski uttanríkismálaráðharrin, Lars Løkke Rasmussen og danski forsætisráðharrin, Mette Frederiksen siga seg einki gott hava at siga um iranska stýrið.

Lars Løkke Rasmussen sigur, at vandi er fyri, at støðan versnar, og ynskir hann stýrið har, sum piparið grør.

Mette Frederiksen sigur, at stýrið í Iran er eitt av ringastu stýrum, sum eru til, og er tað óndskapurin sjálvur.

– Men eitt stórt stríð í Miðeystri hevði havt óyvirlítandi avleiðingar fyri okkum øll, so tað er neyðugt at hugsa seg um.

Tá danskir miðlar spurdu hana, um Danmark fer uppí stríðið, svaraði hon, at tað er ov tíðliga at siga, tí tað eru alt ov nógvir spurningar, sum ikki kunnu svarast í løtuni.